Ang Kahulugan ng “Anak ng Diyos”

Halos lahat ng Muslim ay tumatanggi na si Jesus (Isa Al-Masih) ay Anak ng Diyos. Para sa mga Muslim, ang ibig sabihin ng “Anak ng Diyos” ay literal na ang Diyos ay nakipagtalik sa isang babae at nagkaanak. Pero, ito ba talaga ang itinuturo ng Injil? Ang ibig sabihin ng “Anak ng Diyos” sa Injil ay napakalayo sa pagkaintindi ng karamihan ng Muslim. Kaya mahalagang pag-aralan natin ito ng mabuti:

• Ang Qur’an at ang Injil ay parehong nagtuturo na si Isa ay walang amang tao.
• Ang Qur’an at ang Injil ay parehong nagtuturo na hindi nagkaroon ng sexual na ugnayan ang Diyos upang maging ama ni Isa.
• Ang Qur’an at ang Injil ay parehong nagsasabi na si Isa ay ipinaglihi sa pamamagitan ng Espiritu ng Diyos.
• Ang Qur’an at ang Injil ay parehong nagtuturo na si Maria, ang ina ni Isa, ay isang birhen nang siya ay manganak.
• Ang Qur’an at ang Injil ay parehong nagsasabi na si Isa ay walang kasalanan.
• Ang Qur’an at ang Injil ay parehong tumatawag kay Isa bilang Salita ng Diyos (Kalimatullah).

Maraming pagkakasundo sa paniniwala tungkol sa kapanganakan ni Isa Al-Masih. Pero ang nagiging problema ay ang paggamit ng salitang "Anak ng Diyos." Kaya kailangang ipaliwanag kung ano ang ibig sabihin ng Injil kapag sinasabi ang “Anak ng Diyos”:

• Ang "Anak ng Diyos" ay kapareho ng ibig sabihin ng Kristo o Mesiyas — bilang propeta, pari, at hari.
• Ang "Anak ng Diyos" ay nagpapahiwatig ng kakaibang ugnayan sa Diyos.
• Ang "Anak ng Diyos" ay nagpapakita ng pagiging hindi mapaghihiwalay sa Diyos.
• Ang "Anak ng Diyos" ay naglalarawan ng nagtataglay ng likas na katangian at karakter ng Diyos.
• Ang "Anak ng Diyos" ay nagpapakita ng ganap na pagpapasakop sa Diyos.

Ang Banal na Kasulatan ay madalas inuulit at pinapaliwanag sa iba't ibang paraan. Ganun din, ang “Anak ng Diyos” ay inuugnay sa mga salitang Kristo at Mesiyas na Hari. Narito ang ilang halimbawa kung saan inuugnay ang Anak ng Diyos sa iba pang mga titulo:

“Nang magkagayo'y sinabi sa kanya ni Nathanael: Guro, ikaw ang Anak ng Diyos! Ikaw ang Hari ng Israel!”
— Injil Juan 1:49, MBB

“Sumagot si Simon Pedro, ‘Ikaw ang Kristo, ang Anak ng Diyos na Buhay.’”
— Injil Mateo 16:16, MBB

“Lumabas din ang mga demonyo sa marami na sumisigaw, ‘Ikaw ang Anak ng Diyos!’ Ngunit pinagbawalan sila ni Jesus at hindi niya sila pinahintulutang magsalita sapagkat alam nila na siya ang Kristo.”
— Injil Lucas 4:41, MBB

“Sinabi sa kanya ni Marta: ‘Oo, Panginoon, sumasampalataya ako na ikaw ang Kristo, ang Anak ng Diyos, ang darating sa sanlibutan.’”
— Injil Juan 11:27, MBB

“Ang mga ito'y nasusulat upang kayo'y sumampalataya na si Jesus ang Kristo, ang Anak ng Diyos, at sa pamamagitan ng inyong pananampalataya ay magkaroon kayo ng buhay sa kanyang pangalan.”
— Injil Juan 20:31, MBB

Kaya, sa konteksto ng Injil, ang ibig sabihin ng “Anak ng Diyos” ay hindi pisikal na anak, kundi Siya ang Kristo, ang Mesiyas, at Hari na isinugo ng Diyos. Kasama sa pagiging Anak ng Diyos ang tatlong papel ni Kristo: bilang propeta (nagsasalita ng salita ng Diyos), pari (tagapamagitan sa ating mga kasalanan), at hari (may kapangyarihan at awtoridad).